BAFTA-მ ცერემონიაზე რასისტული გამონათქვამის გამო ბოდიში მოიხადა

BAFTA-მ გაავრცელა საჯარო განცხადება, სადაც ნათქვამია: „ჩვენ ვაღიარებთ მიყენებულ ზიანს, განვიხილავთ მომხდარს და ბოდიშს ვუხდით ყველას“. ეს განცხადება ეხება კვირას, ცერემონიაზე მაიკლ ბ. ჯორდანისა და დელროი ლინდოს გამოსვლისას რასისტული გამონათქვამის გამოყენების ფაქტს. „ჩვენ სრულ პასუხისმგებლობას ვიღებთ იმისთვის, რომ ჩვენი სტუმრები ძალიან რთულ სიტუაციაში ჩავაგდეთ და ბოდიშს ვუხდით ყველას“, - ნათქვამია ბრიტანეთის კინო და ტელე ხელოვნების აკადემიის (BAFTA) განცხადებაში. „ამ ინციდენტიდან ჩვენ ვისწავლით და ინკლუზიას ჩვენი საქმიანობის მთავარ ღირებულებად დავიტოვებთ, შევინარჩუნებთ ჩვენს რწმენას, რომ კინო და ამბის თხრობა თანაგრძნობისა და ემპათიის კრიტიკული საშუალებაა“. განცხადება მას შემდეგ გავრცელდა, რაც ჯონ დევიდსონმა, აქტივისტმა ტურეტის სინდრომით, რომელიც BAFTA-ს ნომინირებული ფილმის „I Swear“ გმირია, ჯორდანისა და ლინდოს გამოსვლისას, უნებლიე ვერბალური ტიკის სახით რასისტული სიტყვა (n-word) დაიყვირა. რობერტ არამაიომ ცერემონიაზე საუკეთესო მთავარი როლის შემსრულებელი მსახიობის ჯილდო მოიპოვა დევიდსონის როლის განსახიერებისთვის ფილმში, რომელიც 1989 წლის დოკუმენტურ ფილმს „John’s Not Mad“ ეფუძნება. BAFTA-მ დაადასტურა, რომ დევიდსონმა ინციდენტის შემდეგ დარბაზის დატოვება ამჯობინა და შოუს დარჩენილ ნაწილს ეკრანიდან ადევნებდა თვალს. BAFTA განცხადებაში აღნიშნავს, რომ ორგანიზაციამ „მიიღო ზომები, რათა დამსწრეები გაეფრთხილებინა ტიკების შესახებ“. ცერემონიის დროს, წამყვანმა ალან კამინგმა მომხდარ ინციდენტს შეეხო. „შესაძლოა, უკანა ფონზე რაიმე ძლიერი გამონათქვამი შეგემჩნიათ, ეს შეიძლება იყოს ტურეტის სინდრომის გამოვლინების ნაწილი ზოგიერთი ადამიანისთვის, რასაც ფილმი იკვლევს“, - განუცხადა კამინგმა დამსწრე საზოგადოებას. „მადლობა გაგებისთვის და ყველასთვის პატივისცემით სავსე სივრცის შექმნაში დახმარებისთვის“. ფილმ „ცოდვილთა“ (Sinners) დამდგმელმა მხატვარმა ჰანა ბიჩლერმა ორშაბათს სოციალურ ქსელში გამოაქვეყნა პოსტი ამ სიტუაციის შესახებ და გააკრიტიკა BAFTA-ს თავდაპირველი ბოდიში. „მესმის და ღრმად ვიცი, რატომ არის ეს შეუძლებელი სიტუაცია. ვიცი, რომ ამას თავაზიანად უნდა მოვექცეთ და გავაგრძელოთ წინსვლა“, - დაწერა ბიჩლერმა. „მაგრამ ის, რამაც სიტუაცია გაართულა, იყო შოუს ბოლოს გაკეთებული ზედაპირული ბოდიში: „თუ შეურაცხყოფილი იყავით“. ლინდომ ასევე ესაუბრა Vanity Fair-ს ორშაბათს და განაცხადა, რომ მან და მისმა კოლეგამ „გავაკეთეთ ის, რაც უნდა გაგვეკეთებინა“, მაგრამ მათ სურდათ, „ვინმეს BAFTA-დან ინციდენტის შემდეგ ესაუბრა მათთან“. BAFTA-ს სრული განცხადება: „გუშინ, BAFTA-ს კინოდაჯილდოებაზე ჩვენმა სტუმრებმა გაიგეს ძალიან შეურაცხმყოფელი ენა, რასაც მრავალი ადამიანისთვის შეუდარებელი ტრავმა და ტკივილი მოაქვს. ჩვენ გვსურს ვაღიაროთ მიყენებული ზიანი, განვიხილოთ მომხდარი და ბოდიში მოვუხადოთ ყველას. ჩვენი ერთ-ერთი სტუმარი, ჯონ დევიდსონი MBE, ტურეტის სინდრომით არის დაავადებული და მთელი ცხოვრება ამ მდგომარეობის უკეთ გაგებისთვის განათლებასა და კამპანიას უძღვნის. ტურეტის სინდრომი იწვევს უნებლიე ვერბალურ ტიკებს, რომლებსაც ინდივიდი ვერ აკონტროლებს. ასეთი ტიკები არავითარ შემთხვევაში არ ასახავს ინდივიდის რწმენას და არ არის განზრახული. ჯონ დევიდსონი არის BAFTA-ს ნომინირებული ფილმის „I Swear“ აღმასრულებელი პროდიუსერი, რომელიც მის ცხოვრებისეულ გამოცდილებას ეფუძნება. ჩვენ ძალიან სერიოზულად ვეკიდებით ჩვენი ყველა სტუმრის მიმართ ზრუნვის მოვალეობას და ინკლუზიის პოზიციიდან ვიწყებთ. ჩვენ მივიღეთ ზომები, რათა დამსწრეები გაგვეფრთხილებინა ტიკების შესახებ, ცერემონიის დაწყებამდე და მთელი პერიოდის განმავლობაში ვაუწყებდით აუდიტორიას, რომ ჯონი დარბაზში იმყოფებოდა და შესაძლოა გაეგოთ ძლიერი ენა, უნებლიე ხმები ან მოძრაობები ცერემონიის დროს.“