ბედ ბანი, ედვარდ ნორტონი, ხავიერ ბარდემი და ვიგო მორტენსენი რეზიდენტეს ფილმში

ბედ ბანი, ედვარდ ნორტონი, ხავიერ ბარდემი და უამრავი სხვა ვარსკვლავი ლეგენდარული მუსიკოსის მომავალ კარიბულ ვესტერნში ითამაშებენ. Deadline-ის ახალი ცნობით, ბედ ბანი (ნამდვილი სახელი ბენიტო მარტინეს ოკასიო), ნორტონი და ბარდემი, ვიგო მორტენსენთან ერთად, მონაწილეობას მიიღებენ მომავალ ისტორიულ ეპოსში „პუერტო რიკო“, რომლის რეჟისორი ლეგენდარული ლათინოამერიკელი არტისტი რენე „რეზიდენტე“ პერეს ხოგლარი იქნება. Deadline აღნიშნავს, რომ ფილმი აღწერილია, როგორც „ეპიკური კარიბული ვესტერნი და ისტორიული დრამა“, და ის დაფუძნებული იქნება პუერტო რიკოს რევოლუციონერის, ხოსე მალდონადო რომანის, იგივე „თეთრი არწივის“ (Águila Blanca) ცხოვრებაზე. სცენარის თანაავტორი ოსკაროსანი მწერალი ალექსანდერ დინელარისი (ფილმი „ბერდმენი“) გახლავთ. რომანი XIX საუკუნის ბოლოს კუბის განმათავისუფლებელ არმიასთან ერთად კოლონიალიზმის წინააღმდეგ იბრძოდა და მნიშვნელოვან როლს ასრულებდა პუერტორიკოული იდენტობისთვის ბრძოლაში. რევოლუციონერი ქვეყნის ფოლკლორში ლეგენდად იქცა, თუმცა გაურკვეველია, ზუსტად მისი ცხოვრების რომელ ასპექტს მოიცავს ფილმი. „ბავშვობიდან ვოცნებობდი ჩემი ქვეყნის შესახებ ფილმის გადაღებაზე. პუერტო რიკოს ჭეშმარიტი ისტორია ყოველთვის დაპირისპირებით იყო გარემოცული“, – განაცხადა რეზიდენტემ. „ეს ფილმი არის იმის დადასტურება, თუ ვინ ვართ ჩვენ – მოყოლილი იმ ინტენსივობითა და პატიოსნებით, რასაც ჩვენი ისტორია იმსახურებს.“ მიუხედავად იმისა, რომ მორტენსენი, ბარდემი და ნორტონი ცნობილი და დამკვიდრებული მსახიობები არიან, ოკასიოს (ბედ ბანი) მხოლოდ რამდენიმე მთავარი როლი აქვს ნათამაშები. ახლახან ის გამოჩნდა დარენ არონოფსკის ფილმში „დაჭერა ქურდობაში“ (Caught Stealing) და 2022 წლის ფილმში „ტყვიის მატარებელი“ (Bullet Train). მას ასევე ჰქონდა მოკლე როლი 2025 წლის „ბედნიერი გილმორი 2“-ში (Happy Gilmore 2). (წყარო: Deadline)