სტივენ ამელი (ცნობილი სერიალებიდან „ისარი“ და „ქუსლები“) Fox-ის არხისთვის Matt Nix-ის მიერ შექმნილ „მაშველების“ რიმეიკში პირველი ვარსკვლავია, რომლის მონაწილეობაც დადასტურდა. ის სერიალში ჰობი ბიუკენონის, ორიგინალური სერიალის ერთ-ერთი გამორჩეული პერსონაჟის როლს შეასრულებს. ჰობი ამჯერად „მაშველების“ კაპიტნის რანგში მოგვევლინება, ის თავისი ლეგენდარული მამის, მიჩის (რომელსაც ორიგინალში დევიდ ჰასელჰოფი თამაშობდა) კვალს გაჰყვება. ჰობის სამყარო თავდაყირა დგება, როდესაც მის კარზე მისი აქამდე უცნობი ქალიშვილი, ჩარლი აკაკუნებს, რომელსაც სურს ბიუკენონების ოჯახის მემკვიდრეობა განაგრძოს და მამასთან ერთად „მაშველების“ რიგებს შეუერთდეს. აღსანიშნავია, რომ ჰობის როლს თავდაპირველად ბრენდონ ქოლი ასრულებდა ერთი სეზონის განმავლობაში, შემდეგ კი ჯერემი ჯექსონი მთელი სერიალის მანძილზე. Fox გვპირდება, რომ ახალი „მაშველები“ შემოგვთავაზებს ადრენალინით სავსე სამაშველო ოპერაციებს, ჩახლართულ ურთიერთობებს, რთულ ქიმიას და სანაპიროზე გმირულ ქმედებებს, რომლებიც ორიგინალს განასხვავებდა. ამჯერად, სერიალი სრულიად ახალი სამსახიობო შემადგენლობით, შოუს საფირმო წითელი საცურაო კოსტიუმებით, თანამედროვე გამოწვევებით, დაძაბულობითა და კალიფორნიის სამხრეთ სანაპიროს დაცვის განახლებული მისიით დაბრუნდება. რიმეიკის 12-ეპიზოდიანი შეკვეთა მაუწყებელმა ქსელმა სექტემბერში დაამტკიცა, მას შემდეგ, რაც პროექტი Fox-ში 2024 წლის ზამთრიდან მუშავდებოდა. გადაღებები ამ გაზაფხულზე ვენის-ბიჩსა და Century City-ში მდებარე Fox-ის სტუდიაში დაიწყება.