„ცოდვილების“ ვარსკვლავმა ვუნმი მოსაკუმ „The Sunday Times“-თან ინტერვიუში განაცხადა, რომ ის ვერ ახერხებს მეორეხარისხოვანი როლის საუკეთესო მსახიობი ქალის ნომინაციის აღნიშვნას, მინესოტაში ფედერალური აგენტების მიერ ორი ამერიკელი მოქალაქის, ალექს პრეტისა და რენე გუდის მკვლელობის გამო. „ვერ ვახერხებ აღნიშვნას იმის გამო, რაც ახლა ხდება – რენე გუდის და ალექს პრეტის მოკვლა ICE-ის აგენტების მიერ მინესოტაში და ხუთი წლის ბიჭის გატაცება“, – თქვა მოსაკუმ. „რთულია ერთდროულად ნომინაციაც და ამბებიც გქონდეს, რადგან ერთი მშვენიერია, მეორე კი – ბნელი და მძიმე; ჭეშმარიტად დისტოპიური – როგორ შემიძლია უბრალოდ გავიდე და სასმელები ვიყიდო, რომ მომენტით დავტკბე?“ მან დაამატა: „[ჩემი ქმარი] ჩემსავით შოკირებული არ არის ამ ამბებით. არსებობს ძალიან უცნაური ამერიკული ფსიქიკა, სადაც საშინელი რაღაცები ხდება და ხალხს მაინც შეუძლია მეორე დღეს სამსახურში წავიდეს, მაშინ როცა მე ერთი კვირა გაოგნებული ვარ და ვფიქრობ: „როგორ მიდიან ადამიანები ხალხმრავალ ადგილებში, როცა ეს ახლახან მოხდა?“. მე მინდა განმარტოება. ჩემი რეაქცია მას ახსენებს, რომ ეს ნორმალური არ არის.“ მოსაკუ არ არის ერთადერთი ჰოლივუდში, ვინც ICE-ისა და დონალდ ტრამპის საიმიგრაციო პოლიტიკის წინააღმდეგ ხმას იღებს. 5 თებერვალს, ჯეიმი ლი კერტისმა „Variety“-ს განუცხადა, რომ „ICE-ის სიტუაცია კონტროლიდან გასულია“. მან მინესოტაში და მის ფარგლებს გარეთ ფედერალური აგენტების ქმედებები „საზიზღრობად“ მოიხსენია. „ყოველდღე მგონია, რომ აღარაფერი გამაკვირვებს და მერე ისევ ვშოკდები“, – თქვა კერტისმა. „ეს უბრალოდ არაადამიანურია. არაადამიანურია ის, თუ როგორ ექცევა ეს ადმინისტრაცია თავის მოქალაქეებს, ამომრჩევლებს და გაჭირვებულ ადამიანებს. საშინელებაა, რასაც აკეთებენ. ICE-ის სიტუაცია კონტროლიდან გასულია. ეს უბრალოდ ყურადღების გადატანის საშუალებაა, რათა ეპშტეინის ფაილებს ყურადღება არ მივაქციოთ.“ ვუპი გოლდბერგი თვალსაჩინოდ ემოციური იყო „The View“-ის 26 იანვრის ეპიზოდში, რომლის დროსაც მან ალექს პრეტის გარდაცვალების გამო გააკრიტიკა შიდა უსაფრთხოების მდივანი კრისტი ნოემი და სასაზღვრო პატრულის მეთაური გრეგორი ბოვინო. „კრისტი ნოემ, ამის გამართლება არ შეგიძლია. ბატონო ბოვინო, ამის გამართლება არ შეგიძლიათ“, – თქვა მან. „ვერც ერთის გამართლებას ვერ შეძლებთ, და ჩვენ ყველანი ვხედავთ ამას და გხედავთ ისეთებს, როგორებიც ხართ. თქვენ ყველას ხელები სისხლით გაქვთ დასვრილი.“